OSBE ndihmon zyrat e informimit ndėr komunal tė rajonit tė Pejės

 

 

Qendra Rajonale e OSBE-së në Pejë, të martën ka dhuruar kamera digjitale dhe pajisje për incizim përfaqësuesve të gjashtë zyrave komunale për informim të këtij rajoni. Siç u tha në takimin me përfaqësuesit e këtyre zyrave për komunikim publik, ky donacion është pjesë e projektit “Lehtësimi i qasjes në informata dhe dokumente publike“ dhe ka për qëllim fuqizimin e kapaciteteve të komunave të Pejës, Gjakovës, Klinës, Istogut, Deçanit dhe Junikut për të ofruar qasje më të mirë për të gjitha komunitetet në rajon.

 
Projekti gjithashtu përfshin edhe një numër aktivitetesh që do të organizohen gjatë muajve në vijim. Këto aktivitete përfshijnë punëtorinë mbi demokracinë pjesëmarrëse dhe qeverisjen elektronike, mbi 30 radio-programe me qëllim të promovimit të aktiviteteve komunale dhe inkurajimit të pjesëmarrjes më të gjerë të publikut në çështjet komunale, publikimin e buletineve komunale, tryezën e rrumbullakët për të shënuar Ditën Ndërkombëtare të së Drejtës për Informim, si dhe përmbledhjen, shtypjen dhe shpërndarjen e rregulloreve komunale etj.



Data: 27.07.2010


    Komuna e Deēanit